「中大校園民主運動」上個禮拜用兩日半攞到千六個聯署，超出門檻成倍，但近一段時間卡住係核實聯署程序入面，遲遲未開始公投。件事丟淡咗一排，實在浪費咗呢場運動可以有既潛力，我試下講返件事既來龍去脈出黎，俾同學參考，希望可以重新啟動一啲有意思既討論。
2.
由「螢」就黎俾人DQ個排開始，有啲普通同學已經列席代表會會議，發現代表會既司法審議程序十分兒戲。直至後來，學生報選舉爆出無間道事件，間諜何正男倒戈揭發「破駢」派間諜去「螢」搜集黑材料，同時踢爆「星火」前會長同前副會長既失德失職行為，呢啲同學先意覺到問題嘅嚴重性︰周竪峰同潘智鍵居然係新一屆代表，會繼續代表同學議政。因此，佢地決定發起一場全民公投，修章提高普通同學既列席同發言權，並且提出罷免周潘二人既代表職位。
周竪峰同潘智鍵做咗啲咩，我姑且歸納係下面。至於係咪足以罷免兩人，就交俾同學判斷︰
一、周竪峰講大話︰前會長周竪峰聲稱自己控告「螢」的資料係有人「匿名」俾佢，但何正男就指証佢講大話，根本由頭到尾都知道間諜陰謀。
二、教唆破駢老屈對手，攻擊反對自己嘅普通同學
周竪峰一直不斷攻擊學生報係老鬼干政、選舉舞弊，但自己反而一早教唆破駢老屈對手同同學。詳情可參考錄音（可以係0:56開始聽起）︰
三、前副會長潘智鍵濫用職權
潘智鍵刻意拖住學生報上莊「縫」既一筆撥款，聲稱要佢地「每人嘔返五千蚊出黎」，濫用職權、公報私仇。
3.
直至「中大校園民主運動」宣佈收集到千六個聯署，周竪峰先係FB出post回應，話同學搞「民粹」、「多數人暴政」、「暴民統治」。聯署同學係咪暴民，發起同學係咪反民主既中共北韓（周竪峰真係咁寫。。。唔信自己click入去睇），大家可以自己判斷。我只係想講下我點理解呢場運動，點解佢值得中大每一位同學關注。
中大雖然係一個有校園普選既地方，但有普選係咪就代表好民主？一個真正既民主理想，需要同學踴躍既政治參與，我地今日仍然距離呢個理想好遠好遠，今年既中央三莊選舉投票率就不足三成。我唔係想批評同學政治冷感，或者大家係校政之外都有各自既社會政治參與。不過，我地活係一個民主運動搞咗三十年仍然未見成功既香港社會，但就係校園度捉到鹿唔識脱角，冇好好運用到呢個民主自治既制度，唔係一件好浪費既事咩？
正正係今次呢場微型運動既發生，證明左同學係可以參與校政討論，即使個個係一個超級陌生、冷門既問題。幾多中大同學由入學到畢業，都搞唔清楚中大學生會架構，代表會係乜更加聽都冇聽過。但今日好多人居然願意肯用十分鐘時間係街站度聽呢個問題，去思考我地應該有一個點樣既制度。
我認為呢場運動既訴求對於中大既民主發展非常重要。其一，佢地抵抗近年代表會成日開閉門會議，又唔俾一般列席同學講野既歪風。其二，佢地令中大任何想參政加入學生建制既人知道，唔係選舉嬴咗，就過咗海做神仙。佢地既公共言行係受到同學監察，同學亦隨時有權通過民主程序將佢地拉落台，以此制衡代議士既權力。代表會話就話只係監督機構，其實佢大權在握，用得好定唔好，係一件好大獲既事。幾年前，我就曾經聽過一個代表好自豪咁講有好多人reg soc時文件有少少錯漏，全部俾佢DQ哂。我心諗，佢到底自豪啲乜呢？佢唔係去facilitate，而係阻住同學想做既野，仲要為呢樣野沾沾自喜，真係極度官僚化。如果冇人去發聲監督呢班人，係只會任由佢地變得愈黎愈脫離同學所需。
4.
講真，我就黎畢業，功利啲講，與其寫呢啲政治野，不如快啲搵工醫下自己啲畢業焦慮症。公屋仔、社科畢業，我真係見住啲經濟壓力一步一步行埋黎。何況，我又係學生報做過，出黎講野，肯定又有人話我權鬥私怨乜乜柒柒。咁我仲寫呢啲野黎做乜呢？我只可以話，臨走之前，我仍然想盡自己作為中大同學既半分責任，希望可以幫下口，希望呢場運動仲有機會行落去。以前我做學生報完全搞唔起既野，今日可能真係有人開到一條新路。我真心覺得，呢場運動既能量（更加具體咁講，係呢一班願意行出黎既同學），係值得每一個關心中大既人珍重。