25/1 荃灣沙咀道花市
「胸襲案」上訴終院不獲法援。花市眾籌，相安無事，暫時回本
＊＊＊
情侶鄺振駹和吳麗英，於反水貨示威被捕，後者被控「以胸襲警」，舉世嘩然。雖上訴高院獲減刑，但罪名依然成立。兩人已申請上訴至終審法院，卻不獲法援。
＊＊＊
問：幾時開始計劃係花市擺檔？
鄺：其實幾倉促，下定決心時，投標期已過一半。當時維園已經冇望，於是去沙田同荃灣搵位，最終揀左荃灣。
＊＊＊
問：你地已經提出上訴？
鄺：已經交左申請，留待終審法院決定。最近收到通知，我地申請法援被拒，話理據不足。
＊＊＊
問：眾籌的目標係幾多？達唔達標？
鄺：我地目標係 30 至 35 萬，之前網上呼籲已經籌到一半。而開檔到尋日啱啱回本，依幾日會繼續努力做生意。
＊＊＊
問：一直擺檔都相安無事＊？
（註：筆者在店外良久，見慕名而來的年輕人和姨姨一同揀衫，氣氛祥和）
鄺：警民關係科特登嚟搵過我地，問我地政黨背景等等；便衣同食環都不時有人望住。但冇事發生。
＊＊＊
問：點解網上會爆發罵戰？
鄺：啲衫係我同朋友一齊設計，對方係 designer，夾埋有五款 T-shirt，兩款衛衣。
因為所有事都到最尾先決定。係我決定用「只有我們才是香港人」，但我事先唔知有類同嘅話出自陳雲先生。
其實我地唔鍾意依個款，一來分開兩行唔好睇；二來電腦字唔型，想搵靚啲嘅書法。臨尾已經改左做「我係香港人」俾製衣廠，我手上仲有樣板。但到最後收貨，廠根本嚟唔切改，咁無辦法唯有照賣。
＊＊＊
問：最後問題比較敏感，你地有冇兼賣青政貨品？
鄺：好老實，佢地需要嘅話，我地一定願意幫手。但暫時冇收過佢地要求同貨品，所以由開檔到而家都賣緊自己嘅貨。全部衫都係由我地設計，我地推出。