某個不知名嘅時空，聚集咗一班奇怪嘅人…
慈父CY：「的確應該將啲時間畀番家人嘅，阿女變到咁極端，都係社會對我嘅負評帶嚟嘅壓力間接造成。其實又有乜嘢比家人更重要呢…」
老公CY：「遲啲冇咗『特事特辦』嘅方便同霸氣，老婆實睇唔起我，除咗要聽佢黑白天鵝，隨時罰我要永久負責幫全家搬行李添，唉…」
黨員CY：「冇黨邊度有國？冇國又邊有家？冇家仲講乜鬼老婆仔女！？你幾時變得咁軟弱㗎！」
良心CY：「但係我的確做咗太多卑鄙無恥嘅事嘛！一早都已經富貴榮華、位高權重，仲要貪各種大小便宜。又用盡心機，心狠手辣，弄盡權術，確實係咎由自取，而家都係時候要面對惡果囉...」
無恥CY：「你個腦壞咗呀！？邊有做大事嘅人會介意埋啲小節㗎！如果所有嘢都按世人嘅規矩辦事嘅話，嚸有可能爬到而家個位呀？『寧可我負天下人，不可天下人負我！』未到最後一刻都絕對唔可以認輸，以前對付唐唐時我哋咪一樣將劣勢扭轉？遲啲風向一轉，又再重新宣報參選，畀所有人嚟一個措手不及。就算中央唔想我參選，到時候米已成炊都沒辦法阻止！」
奴才CY：「但聖命難違，君要臣退臣又怎能不退...」
狠毒CY：「你真係冇用！不過當前急務係要解決UGL單嘢。搞得掂第日仲可以升上神檯，頂上老懵董個位！所以一定要趁仲在位，徹底利用權力重手將單案壓落去。今次向邊個背脊插刀好呢？反正都冇得連任，插多幾個都無妨，到時查極都查唔完就不了了之啦！哈哈...」
病人CY：「嚸解有咁多個我喺度拗埋啲乜鬼嘢嘅？我究竟喺邊度？」
精神科醫生CY：「哼，你真係唔記得？你落咗台之後就被中央秘密拉咗嚟『秦城黑獄』服刑，然後你就開始日日自言自語嘞。不過你向來奸狡成性，冇人會再信你啲鬼話。唔理你真癲定假癲，你都係認命喺呢度過埋你剩番啲日子啦！」
（刊於《立場新聞》、作者Facebook）