傍晚同羅冠聰一齊去香港仔派單張，個街站都未擺好位，就已經有第一位走嚟搵我地既居民，佢係一個街坊打扮嘅嬸嬸，一開口就話好支持我地後生仔，亦覺得年輕人係香港希望咁樣。
坦白講，選舉期間都見過好多居民，咁講完多謝之後，諗住同佢傾多幾句，但誓到估唔到嬸嬸就話：「其實我係 72511，當時同呀聰一齊被人拉」，同我地分享佢從預演佔中至今既心路歷程。
曾經，有511個香港人喺2014年7月2日，因為參與學聯發起嘅留守遮打道行動被捕，我地就將511位公民抗命者簡稱為「72511」………
兩年過後，留守遮打道好似已經過左好耐咁，甚至喺網絡世界再提「72511」，就算唔比人笑，都會好似脫曬節咁，但去到現實世界，原來落到社區同街坊傾計，係會有上左年紀既長輩，因為依一場大家唔願意再提起既「預演佔中」，而同我地一齊作戰。
無錯，事過境遷到今日既政治氣氛唔同曬，非暴力公民抗命都好似恍如隔世，大家未能完全擺脫傘運過後碎片化既陰影，果種無力感都引致我地避提傘運，覺得以傘運為恥。但大家真係唔好忘記，當連社區擦身而過既街坊長輩，都曾經同我地一齊，為住民主理想無懼抗命。
就算失望，不能絕望，寫依個片段比大家，純粹係想灰到爆既各位，一定要頂住，有好多你唔認識既人，都同你一齊撐緊。
希望星期六晚中環遮打見到大家啦。