題為編輯所擬。
話說我之前有考慮過參加基督教特首選委既抽籤，都搵左大約十個既提名。但因為佢只係可以係office hour交表我又請唔到假所以無參加到。但睇番轉頭諗下其實今次真係無參加到仲好。呢次抽籤既搞手基督教協進會真係好離譜。首先抽籤方法方面，人地天主教人人只要係教友就可以參加。基督教就搞埋哂d乜鬼功能組別又堂會又宗派又機構。除左個人提名果邊既人抽中機會好低之外，仲保送左管浩鳴呢d粉人用宗派提名入閘。更加擺左堂會宗派上枱，三宗明明唔會提名人做宗派提名但都係咁俾人話佢地係既得利益者（雖然佢地take個立場係話政教分離而唔係話自己無咁既授權去提名其實有點膠）更加為左一班根本未準備好參與政治既堂會制造左好大挑戰（雖然呢樣野係唔岩，其實教會應該一早搞好d政治教育明白香港究竟發生咩事，由其呢幾年咁大衝擊好應該諗諗佢點搞。）
除左呢個抽籤膠之外，協進會仲好冷血地唔肯同絕食左十幾日既林子健對話，點解一個信徒想就住呢樣野同你傾，你都唔肯，仲要忍心見到佢餓左咁多日都唔理佢？去到之後先搵人落去話為佢祈禱，但都未肯回應子健訴求。點解呢班大牧可以咁冷血？你話政治既野你唔識所以搞到好亂ok fine家下有人同你傾，你又唔理人由人地餓既。唔好講聖經，就連儒家都有講惻隱之心人皆有知，呢班人點解可以咁忍心？
膠事陸續有來，原來佢仲出爾反爾DQ埋東正教個參選資格。原本你同人講話人地係特殊情況因為佢無其他參選途徑所以開綠燈。點知一向鼓吹宗派合一既基督教協進會竟然一句話東正教唔係一般定義既宗派和教會就DQ人，完全遺反佢地自己提出合一既神學觀點，一個搞合一既組織竟然帶頭杯人，究竟係咩解究？
總而言之，今次基督教選委呢單野真係好有問題，更加引申到我地成個特首既選舉制度好有問題。點解唔係我地所有人要有權選，而係由少部份人決定咩人有得選？正正就係中央同特區政府唔肯搞一個真正普及而平等既選舉，繼續延續呢班既得利益者既利益。身為基督徒我地相信眾人皆平等，就應該要反對特權，讓選舉既權利歸於我地每一個人。