呢番說話，我等到今日先講，希望有識之士響下年64之前呢364日考慮下。
六四晚會主要係儀式性嘅悼念，呢種儀式為主嘅悼念，即使係由1989年六四百日祭開始已經有人質疑，咁多年嚟，六四晚會嘅形式有過改變，例如話劇、選曲、口號、程序，有支持有反對，不過響2014雨傘之後，其實好多人心態改變咗，純粹響六四表達拒絕遺忘已經唔能夠號召到更多人。
愈來愈多人想有更多深入嘅討論、反省，想思考六四屠殺與自身嘅關係，絕對係好事。尤其是對六四冇親身記憶嘅人，佢地更加會問悼念嘅意義、與香港社會嘅關係。
如果去維園晚會唔能夠做到以上嘅嘢，佢地會選擇做到嘅地方，唔理係港大定中大。
六四屠殺呢個問題，唔同意識形態嘅陣營會有唔同解讀，將悼念六四屠殺同佢地嘅政治理念扣連，例如台灣政壇會將六四同sell台灣民主價值連繫，咁擁抱本土價值嘅組織，就會將六四同香港前途扣連。至於支聯會都有，就係支援中國民主運動（雖然實際上係訊息同情感上支持），之前講過雨傘精神、爭取普選，不過似乎都唔係主線。
咁支聯會有冇錯？冇。不過inconvenient truth 係，當中國人身份認同愈來低嘅時候，支聯會講緊嘅議程愈來愈少人投入支持。支聯會唔正視呢個inconvenient truth，只會流失更多人。
你或者會問，咁你又去維園？我係89年嘅細路，六四屠殺對我感情上有羈絆，我希望參與最有規模嘅悼念，算係對天安門母親呢啲仍然受迫害嘅人一點精神支持，所以我寧願俾人話我戇居，我都係去。不過我係網台精，我係會聽番晒中大、港大嘅論壇錄音（如果有），知性上我係想聽深化討論的。對於維園羈絆比較細而想有更多思考嘅人，佢地去咗中大港大，正常不過，冇咩值得批評，支聯會嘅人唔該唔好跌入世代之爭嘅設計，世代之爭，永遠都係年輕嘅一方有利；我呢番說話亦係講俾X人港豬覺得自己好型嘅人聽。須知道響六四晚上，吃喝玩樂緊，對民主價值、香港前途I don't .... care 嘅人大有人在，仍然去悼念或者尋求反思嘅每一個人都值得尊重。
最後呢段說話，唔只講俾支聯會嘅人聽，亦係講俾X人港豬覺得自己好型嘅人聽。