是咁的，睇完城市論壇真係睇到嘔血，亦勾起我每次與非學術／文化圈子的親戚討論時政的痛感。話說，我曾有感在親戚飯局，講咩野都被deduce為「細路」、「細路女」、「後輩」之身份而被silence，往往令人痛感「年齡」同「性別」對一個人的political participation帶來的限制。
今日城論，真係超級嬲，針對「年齡」的discursive discipline 被放到大過宇宙黑洞，同時鄧小樺的女性身體竟然可以被人咁赤裸裸的擺上枱鞭撻。何君堯無理啦啦以「行為藝術」的騎呢例子引出叫鄧小樺公開現場除衫，唔係為類比說明，其實係為左羞辱對手。裸露對女性主義者而言當然唔係一樣令人受污衊的行為，甚至係empower女性，或女性的抗爭或利用以抗爭的主體，或言是site of transcendence，但係係主流／傳統性別關係底下的社會文化脈絡中，係人面前除晒衫就絕對係醜到無比的事。何君堯以此絕對是羞辱對手的攻擊，並distort且嘲笑行為藝術的理念和意義，盡顯一己的膚淺醜陋，小人之心和惡俗滑頭。令人感到可怕的是，後來一名中年女觀眾竟叫「何小姐」（其實是鄧小樺）除衫，女人以女人最怕之事羞辱女人，可見「女人」並不是一個同質的群體，生理女性一樣可以有非常父權思維，同時以父權的攻擊和規訓去監控、打壓、羞辱其他她所敵對的人，不只女性。
令人最悲哀的是，無論你胸有千萬書卷腦藏古今智慧，只要你是「女人」，或者係「後生仔女」，在公共論政的場合，你永遠無法突破被deduce的命運，而很多時deduce你的人都未必在智力上邏輯上比你優勝，只係為了羞辱你、嚇窒你、大你，自以為自己贏了，其實是輸成一副醜陋相。