我永遠記得，大學男同學Vincent，在畢業前公開了同性戀者身份。然後在一次聚餐中，同系的某君訕笑：「其實做基佬咪算囉，做咩要公開啫，偷偷哋咪幾好。」
Vincent放低啤酒，反問：「點解異性戀者就可以喺facebook高調晒幸福，同性戀者就要匿匿埋埋？」，某君繼續嬉皮笑臉：「咁你會畀人歧視喎，你唔驚咩？」。
Vincent說，要爭取平等，第一件事，就是別把自己當成低人一等的怪胎。
結果，只換來某君的一句：「搞Gay都咁揚，你自己睇路啦。」我忍不住插嘴：「你呢啲仆街就要睇路喇，屌你老味。」聚餐不歡而散，我失去了一位「朋友」，卻換來Vincent一聲「多謝」。
那夜我們在南山邨的公園吹水，他說，意識到自己是同性戀者後，試過找來前度傾訴。對方跟他說，要愛一個人，首先要學會面對自己，否則只會因為自卑，叫雙方都痛苦，所以，不要害怕。
這番話令這對從前戀人成為最好的知己，也叫Vincent鼓起勇氣，向心上人的他示愛。年多以來，他們都很幸福，而惟一一次公開牽手，是在墨爾本，此後，再無下次。
於是，Vincent決定「出櫃」，讓全天下知道，愛，沒有罪。他知道路很難走，也曾後悔過，但最重要的，是找到前所未有的舒坦。「畀人叫你Gay佬，好過拖住個女仔扮『正常人』吖」，Vincent如是說。
很多人，口裡說不歧視，心底卻想要清除礙眼的畫面。這種偽善，如像政治中立的垃圾，說不反對抗命，但也得維持治安。我識書唔多，只想講句「屌你老味」。
眨眼又幾年，Vincent和愛人仍然甜蜜，我們身邊的情侶卻紛紛離異。他說，同性戀者要找到情人，並不容易，所以更懂得珍惜，「我覺得係還原基本步，愛情，本來就應該咁簡單。」
「世界係咁o架啦」，屌你老味，呢句真係難聽過粗口。
同性戀被歧視，係咁o架啦；香港樓價狂升，係咁o架啦；8.31人大決定，係咁o架啦；含淚投泛民，係咁o架啦。
「我唔係唔支持啊，只不過個世界就係咁，所以你都係唔好咁做喇」，哇，呢啲說話聽到都要洗耳。你去食大家樂，屌你有pat屎喺度，係咪唔退錢啊？係咪照食啊？
喂唔煮都煮咗啦，我唔係唔明屎係難食啊，只不過個世界係咁，你都係照食啦。但係講明先啊，我撐你o架！
你話改變世界係理想論，但希望你明白，出櫃明志嘅人就係抱持呢個要改變世界觀念嘅決心。
要企喺出櫃者嗰邊，係唔可以大大聲話：「世界係咁o架啦」，因為要同性戀得到認同，世界唔可以係咁。
「世界係咁o架啦」，講好易，亦好convincing 。你話改變世界好天真？我知，我明我都覺。
但就係愈嚟愈多人come out企出嚟，十年後會點？let's see，但唔做一定無機會改變。
其實「世界係咁」，香港人應該乜都唔好做，等死就最好。年輕人，唔好成日合理化你心目中嘅「世界」，覺得有夢嘅人點都要屈服，咁同做狗，其實係無咩分別。
真係好躁。
原文刊在作者 Facebook Page，題為編輯所擬
作者 Facebook Page