尋日响深水埗舉行的「我要真小販」活動中擺檔，記錄返一D感受，可以分為兩部分︰
第一個重點，當然係不服於政府同民賤聯！咁多年的桂林夜市無左，新年流流都唔俾小販發個新年財，政府口口聲聲話衛生問題，咁一刀切取締左就了事？社區空間的運用應該由市民自主，唔係政府話唔俾乜唔俾物，其他國家/地區都有夜市啦，點解香港會無夜市？然後，見到有團體發起「我要真小販」活動，身為呢區街坊，當然要撐啦！
由於要幫手set場，尋日中午1點半已到深水埗地鐵D2，周圍都係食環，仲有慈母，我拎住幾袋野同兩張摺櫈，個樣一睇就知係黎擺檔，另外有位同路人話︰「有無留意D食環係度監視緊我地？」我心諗，X！食環平時處理水貨客又唔見咁積極？！
開始set場時，有D街坊圍觀同走黎吹水，「你地唔驚俾食環掃咩？」我︰「唔驚呀！照擺！」然後有位伯伯好勞氣咁話「民賤聯正X街，而家買個飯都咁鬼貴，新年果幾日都唔俾人擺！」其實，基層街坊唔代表唔關心社會，可能平日忙於搵食，但有不公義之事，心裡都有好多意見或怨氣，不過，可能唔知有咩途徑可以表達不滿，有個活動或者平台，可以俾街坊有個機會舒發意見。
活動正式開始後，好多市民黎撐，人數係遠超過我所想像，即係好多人都關心桂林夜市呢單野，身體力行黎到桂林街撐小販！詳情我唔講啦，好多媒體都有報導。最重要係，活動去到中段，我見到有幾檔真正的小販敢於出來擺賣，我地人多，唔驚食環打壓！！！
個活動係咪叫成功呢？我無資格講，不過，扯開少少話題，尋晚出街，行到深水埗D2，我要真小販活動雖然收了，依然有市民在此開咪論政，唔知係咩團體定係市民自發，有街坊圍住聽。以前有佔領區時，當從旺角返到深水埗會有種失落，點解深水埗同旺角咁近，但好似平行時空咁……而家，見到D2有人論政，又見到我要真普選標語，有d感動…… 同時，好感激小麗老師黎到呢區開講，又好感激好多團體同媒體關注桂林夜市，街坊們有個機會思考返本區問題，思考返自身權利問題，有個機會發聲，表達自己想法或不滿。
諗返各團體的落區深耕細作，到底有無用呢？唔知呀。但我住左呢區咁多年，呢個農曆新年，深水埗的氣氛確實變得唔同左了！