圖：獨媒記者 Gundam
其實關於雨傘革命既延續，我係有個遍地開花既諗法，呢件諗法我會形容為用政府（立稅人）既錢同資源，合法(legitimate)地打倒呢個政權。呢樣野應該有好多人都各自向唔同既地區做緊，但我提出既係覺得今次有個契機由年輕人主導，大規模咁去做呢件事。做左呢樣野，唔一定會令2017有真普選，但可以遍地開花，令走左出來既行動者延續革命既熱情同從群眾底層開始改變呢個社會，從而令到周融之流好難可以吹到雞撐場，甚至改變區選既結果。
入正題: 由於我係草根階層出身，住左廿幾年公屋，所以呢樣野係圍繞住我成長，呢樣野就係屋村既互助委員會。我應該有同大家講過，我而家係良邨良俊樓既互助委員會秘書，所以我就加入左一個由師奶阿叔（一般市民）組成既圈子。呢個會既委員，基本上都已經連任左8屆（3年一屆）以上，而且以往既主席都係親建制，甚至試過以民建聯代表去選區議員。即使而家主席無既定立場，d委員都會互相forward抹黑雨傘運動，泛民等等既圖，片，文，字。有部份就係我地所講既所謂無知婦孺，就會被呢種片面既資訊（例如阻住條路有冇搞錯）而接觸唔到真普選有對香港會帶來咩改變既討論。呢d抹黑資訊，部份係制作精美，而且好易入口，明顯係針對街坊之間傳播而製作既。唔好睇少d師奶，佢地可能比我地仲鍾意forward whatsapp，而且佢地好多時都唔會分析就會forward出去。
我想提出既係，重奪互助委員會同業主立案法團。立案法團比較複雜（例如坐擁龐大財政資源，以致好多人都虎視眈眈），而且我唔熟，所以先分析互委會。
每個互委會都有免費辦公室，可以報銷行政開支，可以申請資助搞蛇齋餅糭。諗下一班柴娃娃同你同一架車去長洲，你向架車度想同佢講乜q議員係仆街都得啦，仲唔怕有黑社會來清你個場，唔會有黑警攞毆你。去完旅行，抄左佢地電話，hea hea地send 100毛既圖比佢地，佢地都會幫你forward晒比鄉親父老。
咁點可以做到呢？其實話難唔難，最緊要有人有部署。因為每一棟公屋都有互委會，3年選一次，只要你係住果樹，夠18歲就選得。首先選層代表，基本上都冇人會出來爭，有6票（同一層既唔同單位）就可以當選。選完層代表，就要開大會由層代表互選主席之類既委員，呢個時候就好關鍵，因為做開既人都會互相支持（所以先可以連任廿幾年），所以手上既層代表票既數量可以完全影響大局。投票，投完就搞掂架啦，仲兒戲過學生會，但你就有3年時間去用政府（區議會）撥款去做你想做既任何事（咁滯），只要每季做財政報告，久唔久民政處同你聯絡下，唔好唔記得預先申請定撥款就得。
一般互委會都冇權力既，最多係被諮詢下，開個會，所以都冇乜人有興趣，冇人會爭，一做就做一世。最有興趣既就係民建聯，所以有唔少老化既互委會同委員都好紅，而且因為可以申請到民建聯地區撥款，所以佢地都好效忠左派，亦成為佢地既鐵票。
簡單黎講，歸納我既提議，就係走入社區，合法地用政府既資源，神不知鬼不覺咁滲透民主既意識入地區，遍地開花。不過效果唔係立竿見影，只能話民主化唔係一朝一夕既事，由年輕人去注入新思維，起碼希望可以打亂建制派既部署，延續雨傘革命，用屋邨包圍金鐘。
我相信革命係需要有中央统籌的，因為最簡單既對遊戲規則既理解都要有人教啦，點填form，點攞錢，大家兩頭中都唔係辦法。加上要有效果，有需要有一定程度既统一性，例如向某個議題上（三跑?）對社會最大禍害係乜，有人主力做文宣，再whatsapp出去各區散發（街站都慳返）。再者，可以保持到各區既積極性，唔會覺得孤軍作戰，因為未見到成效就失去左熱情。中央亦可以協助處理文件往來，我估大家都明白學生/年輕人對填表入form既厭惡，再加上要提早3個月做，可以想像到會有幾甩漏。
畢竟雨傘運動動員左咁多人，想佢地慢延開去，星火燎原 。