近排因為電話壞咗，搭車嘅時候冇歌聽就唯有聽吓周圍嘅人講咩啦。
有三個中年男人係度討論佔領行動，佢地有幾個 point 搞到我好想講吓自己嘅睇法，純粹個人意見不喜勿插。
一、「我都支持真普選架，但唔應該阻住人搵食搞到人地搭車搭耐啲囉」
如果一啲唔阻住社會運作嘅行動例如遊行集會可以爭取到嘅話，我相信所有佔領人士都寧願日日出嚟遊行集會都唔想晚晚瞓街。由03年開始，香港人年年七・一都上街遊行，梁振英上場之後就連元旦都有遊行添，但我地爭取到啲咩？唔好話爭唔爭取到呀，政府連正視遊行人士嘅訊求都冇，咁我地係咪仲要繼續遊行示威到終點最後一齊唱首歌就散水？「阻住人搵食」從來都唔係我地想嘅，只係逼於無奈之下先用啲咁嘅方法。
再者，「阻住人搵食」嘅究竟係政府當前向權貴傾斜嘅政策定係佔領者？政府放任大財團壟斷市場，中小企嘅生存空間越嚟越小，熟悉嘅小店無法承擔高昂嘅租金而被逼結業，勉強生存到嘅小店面對加租嘅壓力毫無反抗之力；市民被逼幫襯連鎖餐廳，連鎖餐廳係年年有盈利嘅情況下不斷加價。咁究竟係邊個阻住人搵食阻住人發達？
雖然呢啲說話由我地投身政改運動開始已經不斷講，咁總有啲人會無視我地咁我都明嘅，但係點解仲可以有人覺得政制發展唔關自己事，個人利益重要過所有野？以前或者仲可以話件事唔關自己事，但依家已經殺到埋身啦，點解仲唔醒？
二、「班學生死要面輸唔起所以唔肯退場」
退場與否，從來都唔係學生可以決定到。就算雙學話退場，但又係咪真係咁就退到場？當個個都大嗌「學聯不代表我」、「雙學不代表我」嘅時候，雙學帶頭話退場有咩用？係未有替代方案可以彌補退場失去嘅政治籌碼之前就退場係咪明智嘅決定？無可否認，繼續佔領唔係辦法，升級亦係事在必行，但點樣有效地升級？或者有啲人唔 buy 雙學係咁搞吹水會係咁討論，但今次呢場運動唔只係學生運動，市民大眾嘅參與不比學生少，如果大家唔傾咁點樣先可以有個具代表性嘅決定？
最重要嘅係，輸唔起嘅唔係學生，而係香港。我好記得有次係金鐘現場同幾個婆婆傾計，佢地其實已經移咗民仔女都係有外國居留權，佢地番嚟嘅原因好簡單：因為今次失敗咗就唔會有下次，今次學生完全係打政府一個措手不及，如果今次衰咗廿三條仲會遠咩？
輸唔起嘅從來都唔係學生，而係香港。
三、「班學生個個收哂錢俾人洗哂腦」
呢樣真係無野好講，可能係因為中共文革時期成功洗到班後生腦等佢地個個變哂紅衛兵所以佢地以為我地都係咁啦
講多次：不喜勿插純粹個人意見。