20141121 20:59 金鐘 學聯兩位同學發言 transcript
作者按：主流傳媒未必報導學聯兩位同學的發言。在佔領區的朋友也未必會有mobile data看video，故打此transcript，希望大家知道學聯兩位同學嘅立場。如果你認同這個立場，請幫忙把這transcript share出去，讓更多人能知道他們的立場。謝謝。
個人意見：似乎大家想討論的，主要是大台的用途，誰人用大台，以及金鐘的糾察制度。我由922開始，一直自己耳聞目見，覺得，雙學的同學，是不喜歡造王，不喜歡大佬文化，希望議題都是透過討論溝通協商去達到共識。是負責任，照顧同伴的行動者。今次以及好幾次之前的事件，雙學的同學們都盡力想協調，整合大家的意見。我認為幾位同學都是無私地希望能協調，讓大家能在這艱難的爭取民主路上一起前行。我很尊重這份氣度及對民主精神的執著。大家性格不同，角度不同，有不同意見，很正常。但希望大家都能理性討論，而不是胡亂叫囂或迫埋去同學們度。大家有共同的爭取民主的目標，大家都是戰友，那就不要這樣叫囂。
岑同學：係咪每一位harcourt道嘅村民，每一位雨傘運動嘅參與者，都係可以上嚟講嚟。（有人拍掌，有人叫囂） 可唔可以答我係唔係？（群眾：係！） 我想問各位，係唔係支持雨傘運動理念（同時間另一把咪聲，聽不清楚），希望爭取民主嘅朋友，都係我嘅同路人（有人喊：係！）。如果係咁嘅話，我想講一樣嘢，我想講一樣嘢（台下有人叫囂，有人喊：俾佢講啦！岑同學苦笑），如果大家都覺得呢個大台係屬於大家，呢隻咪係屬於大家大家都可以講嘢，而講嘢嘅都係大家嘅戰友嘅話，我希望大家可以尊重一個規則（有人鼓掌），就係希望大家可以做到互相尊重。唔好有朋友講嘢，即使係不合理嘅意見，或者即使同你嘅理念係有衝突，就喺下面叫囂或者完全係掩蓋咗佢哋嘅聲音（有人鼓掌）。因為民主，爭取民主唔僅僅係一張選票，更加唔僅僅係一個制度，更加重要嘅係點樣實踐，而民主嘅實踐，就係在於多元，就係代表互相尊重。所以希望各位，可以做到互相尊重，包括係唔同發言嘅朋友，包括係唔同理（念）嘅朋友，我哋香港人做唔做得到呀（聲沙）？（有人答：做得到！+ 鼓掌）
周同學：我想補充一點就係，其實呢個大台，喺金鐘嘅村民，每一個人都會認同，呢個大台唔係一個大台，佢只係一個台（有一女子大聲叫喊），我哋喺好多晚嘅吹水會裡面，都有講過有傾過，個台要應該點樣用。嗰陣時有好多嘅金鐘村民，好多雨傘運動嘅佔領者，都話希望俾更多嘅市民，更多嘅運動參與者發言。就係傾完幾次之後，你話個台，已經再唔係一個兩個人去發言。而我哋每一晚，都有自由發言嘅環節。我哋唔希望，我哋既然全部都係呢個運動嘅參與者，都係同路人，我哋謹此希望，事實上面，我哋應係要釐清番，我哋有改善嘅地方，我哋有改善嘅空間，我哋亦都有改善嘅對策（台下有人叫囂）。我哋透過對話，喺吹水台，如果我哋冇吹水台，就唔會有所謂嘅台，不斷改善嘅地方。我想問吓，如果冇嗰啲所謂對話嘅日子，個台係咪會有開放發言嘅環節，可能以往大家批評話唔係（台下不斷有人叫囂），但係點解每晚大家都會喺度自由發言，就係因為唔同嘅村民，我哋都會同佢傾，話個台，我哋應該點樣攞嚟用，我（呢）個唔係一個我哋專屬壟斷嘅台，佢每晚可以俾大家發言就證明，佢係金鐘村民嘅大台，佢係雨傘運動參與者嘅台（有人鼓掌），而唔係大家純粹喺度謾罵就可以改變到佢嘅性質。
映像（影片：SocREC 社會記錄頻道，圖截自同一映像）