學聯代表被拒上京 金鐘現場發言 (20141115) Full transcript
(圖文版權及credit請見文末; 內文bold是筆者所加)
周永康: 大家好, 我係學聯嘅周永康。企喺呢度嘅時候呢, 聽到咁多市民嘅掌聲呢, 我哋其實聽喺上嚟係覺得好感動嘅。但係同時間我哋都喺度諗嘅係, 其實我哋冇做到啲乜嘢好大不了嘅事情, 只不過我哋好似係面皮厚咗啲啲, 冇咁驚俾人註銷回鄉證, 於是行多一步, 話要上北京, 話要個政府俾個交待我哋。我覺得我哋做嘅嘢其實同大家做嘅嘢係相差無幾。我哋做嘅嘢可能頂多只係俾大家多半步, 多四分一步。啱啱有啲, 其實未上嚟呢個台之時呢, 其實我哋頭先開咗個記者招待會, 咁有啲記者朋友問到, 吖其實你哋俾人註銷咗回鄉證, 返唔到北京, 又入唔到大陸, 其實你哋嘅感受係點樣架呢? 其實當時都冇細諗嘅, 當其時我哋淨係覺得, 你註銷咗回鄉證個政治性嘅意義呢, 比我哋個人嘅感受嚟講呢實在強烈太多嘞。佢註銷得你嘅回鄉證, 即係話你哋年青一代嘅聲音, 佢唔聽, 佢唔理, 香港政府, 你同佢講咗一次, 佢唔理; 希望入大陸, 希望上北京, 同佢講第二次, 佢又唔理, 然後忽然間佢同你講你張回鄉證冇咗架啦嘅時候, 我哋覺得, 其實, 喺未來, 呢個政府仲會用幾多嘅心力, 嚟同我哋一整代人溝通呢? 我自己真係覺得係一個好大嘅疑問。但係到呢一刻, 你問我仲有冇一啲好個人嘅感受呢, 我覺得其實就係, 對住啲咁嘅政府, 對住啲咁嘅官員, 對住啲咁嘅處事手法呢, 除了無奈, 其實你係講唔出任何嘅字眼。因為你會發覺, 佢做任何嘢, 任何政策, 任何處理方法嘅背後, 都係冇原則可言, 都係冇理念可言, 都係冇任何價值可言。我成日喺度諗就係, 有啲學生, 有啲朋友, 有啲佔領者上到台上面分享嘅時候, 大家會俾好多嘅鼓勵佢哋, 會俾好多嘅鼓舞佢哋, 會認為佢哋做得啱, 佢哋做嘅嘢係正確, 佢哋同大家嘅信念理念係一樣。所以大家一齊抗爭, 共同進退。但係呢個時候, 我喺度諗嘞, 吖呢批註銷回鄉證嘅官員, 唔聽取民意嘅官員, 如果佢哋係有勇氣嚟到呢度嘅時候, 佢哋面對嘅係掌聲吖, 定係唾罵聲呢? 一定係一巴又一巴車過去, 唾罵聲接二連三, 源源不絕。但係就係呢批咁唔受香港人歡迎, 咁唔受市民歡迎嘅人, 竟然可以牢牢掌握住我哋香港人未來幾十年嘅走向, 以往如是, 未來, 更加係權力源源(牢牢)不放。今日去到機場嘅時候呢, 其實我哋係經過, 重組返呢其實係好詭異嘅。有好多位呢其實我哋係冇為意到, 但係食飯嘅時候呢先發現到, 其實有好多位呢係好騎呢嘅。我、Eason、同埋阿Nathan呢, 其實係大概兩點零三點鐘呢, 係去到機場嗰度。咁喺機場嘅時候呢, 有好多黃絲帶嘅朋友, 佢哋撐住雨傘嚟聲援, 去鼓勵學生, 去希望大家嘅聲音係可以帶到去北京。同呢啲朋友講完嘢之後呢, 咁大家就繼續去前行啦, 右手面呢就係國泰好多嘅counter。咁行到去前面嘅時候呢, 咁有批藍絲嘅朋友, 咁佢哋就有佢哋自己喺度嘅叫囂啦。行咗一陣嘞, 咁就會有批記者朋友喺度, 咁我哋答完啲問題之後呢, 咁因為人好多啦, 咁我哋幾個呢, 就俾啲保安同警方呢, 咁就叫咗向前面嗰個方向呢, 沿住啲緊急通道呢, 就入咗去所謂嘅離境大堂, 其實即係大家check完boarding pass嘅時候, 就會有啲運輸帶呀, 去check, X-ray呀, 照大家啲嘢呀, 去驗屍骸呀, 嗰個住置。咁大家平時嘅位置呢, 就係左中右都有啲運輸帶過去。我哋一入到嘅時候呢, 就企咗喺成個大堂最左手面嗰度嘅。咁嗰度有大批嘅保安啦同埋大批嘅警方啦, 就棟咗喺度。咁喺嗰個時候呢, 其實啲保安就問我哋呢, 喂你哋有冇個boarding pass呀? 咁我哋就同佢講呢, 喂, 其實我哋係有嘅。咁嗰個boarding pass呢, 其實係一個mobile boarding pass嚟嘅。咁就係, 其實就係呢, print咗出嚟呢, 就可以用得架嘞。但今日因為喺混亂之間, 我哋就已經入咗去啦, 咁我哋啲mobile boarding pass呢, 就喺出面嘅幾位同學手上面。咁於是就話, 吖, 其實要出面(去)同佢哋攞架喎。咁無幾耐呢就有個白衫嘅機場保安同警方呢, 就行咗出去, 問我啲同學, 問佢, 喂, 你係咪有嗰個登機證呀, 係咪有嗰個mobile boarding pass呀? 咁嗰個警方同個機場保安呢, 睇到同學手上面嘅證嘅時候, 就立即掉頭走, 就話, 呢張boarding pass唔得, 呢張唔得, 呢張唔得。咁同時候呢, 其實同時間亦都有人話呢, 嗰啲mobile boarding pass呢, 係得架喎。即係其實呢張OK吖, 但係亦都有同事話, 呢張唔得架喎。咁呢個情況呢, 我哋再思索番, 我哋就發覺, 咦, 係難以理解, 點解會有啲咁嘅位出現。咁然之後, 我哋呢, 就繼續喺嗰度等啦嗰三個人, 但同時候呢, 大家都知道啦, 今日其實係有第四個人呢係同我哋一齊去嘅。佢呢, 係學聯嘅前成員, 以前呢, 都係學聯嘅同學仔之一。咁佢本身諗住上北京嘅時候呢, 就做好多聯絡嘅工作啦。因為喺過往好多個禮拜裡面呢, 我哋同好多熟悉國情嘅朋友, 喺上面會公幹嘅朋友呀, 大家都會傾到呢就係, 以往大家北上嘅時候, 特別係啲政治意涵嘅北上團嘅時候呢, 大家會用乜嘢嘅處理方法, 會有啲咩人同行, 佢哋會做啲嘢。咁今日嗰位同學, 嗰位朋友阿曾諾軒啦, 佢就係負責做聯絡同埋啲雜務嘅工作。咁佢嗰個時候呢就唔係同我哋三個一齊嘅。佢呢, 自己就係準備入呢個離境大堂嘅, 就攞住頭先, 大家所謂嘅mobile boarding pass嘅。咁但係佢準備入去嘅時候呢, 就俾個保安拒絕, 咁就話佢嗰張登機證係有問題, 咁就要佢去個登機櫃位去辦理。另一個吊詭位呢就係, 當出面嗰個阿Jeffrey, 即係曾諾軒, 咁佢去呢個櫃位辦理嘅時候呢, 同時間, 喺我哋三個嗰邊嘅白衫機場保安呢, 又再次行出嚟, 同我哋本身, 攞住我哋三個嘅boarding pass嘅同學嗰度, 攞走咗我哋嗰三張本身話唔得嘅boarding pass, 然之後話會幫手, 去處理嗰啲登機嘅事宜。咁但係喺佢攞咗三張boarding pass之後呢, 我哋呢, 就喺我哋企緊嗰個位, 聽到嗰啲保安同啲警方話, (望住鍾同學, 鍾同學扮保安聲音) 佢哋話: 大家hold住先。警方傾緊。係咁架。但係之前呢, 啱啱我哋等緊嘅時候呢, 係機場嘅保安呢, 一直都有跟進我哋嘅資料, 同埋問咗我哋兩次嘅, 一次就係問我哋攞回鄉證睇, 佢哋話會幫我哋搞我哋嘅boarding pass; 跟住第二次再返嚟呢, 就問我哋嘅有效日期。咁我哋梗係全部有足夠嘅有效日期先去啦。咁佢哋再去一次跟進緊嘅, 咁之後我哋就聽到嗰句嘞, 就係話: 大家hold住先, 警察佢哋傾緊。(周同學繼續發言) 咁喺呢個時候呢, 其實你再諗番呢, 你就覺得係好詭異喎成件事。咁與此同時, 我哋亦都收到出面嘅朋友呢, 阿Jeffrey曾諾軒嘅電話, 佢話佢喺國泰嘅counter呢就俾個職員話, 佢張回鄉證就被註銷咗嘞。咁我哋知道咗佢嘅情況之後呢, 就預計咗我哋嘅回鄉證呢都係無一倖免架啦。因為本身其實你問阿Jeffrey曾諾軒, 佢唔係啲最活躍嘅前線工作人員, 佢喺背後, 今次係諗住幫手做啲聯絡工作架添, 都被註銷嘅時候, 大家都諗到, 誒, 大家對望都諗到, 其實我哋可能連機都上唔到架嘞。咁果然呢, 喺冇幾耐之後呢, 啲警方同埋啲機場保安呢, 就同我哋話, 你哋嘅boarding pass呢, 登機呢, 就要去番國泰個登機櫃位做。咁於是呢, 就將我哋呢, 移送番去個緊急通道出面, 咁就出番去國泰嗰個counter嗰度。咁行到去國泰嗰個counter度呢, 咁國泰個職員呢, 就已經係攞住咗張紙, 就準備讀架嘞, 就係呢, 今日呢, 就收到當局嘅指示, 咁就話呢, 你哋嘅回鄉證呢, 就係被註銷咗架嘞。因為你哋冇有效文件可以返到大陸, 咁所以呢, 國泰都冇辦法幫你哋辦理任何嘅登機事宜。咁我哋今日, 成個過程, 成個事宜, 就係咁樣, 非常之黯然咁樣呢, 就喺個機場終結咗我哋本身嘅北京之旅。你見到裡面其實好多位呢都係好奇怪。就係呢, 本身你話航空公司, 你話個mobile boarding pass, 應該可以用嘅。你見到個保安話, 應該可以用嘅, 但係亦都有保安同事話, 呢啲唔係嘅。咁其實, 邊個先係呢? 孰真孰假呢, 邊個可以用呢? 如果係唔可以用嘅, 咁無理由一開始就話啲mobile boarding pass應該要print出嚟吖。咁到到之後呢, 大家話等嘅過程裡面, 點解又會有一啲保安話, 誒, 等等先, 警方要處理。咁呢啲字眼, 點解又會不逕而出呢? 到底成個過程發生緊乜嘢事, 我哋唔知道。但你可以見到, 呢個政府, 佢話佢會依法治國, 但係, 法理何在呢? 理據何在呢? 或者個機場個職員, 攞住張紙朗讀, 話你哋嘅回鄉證註被銷咗啦, 然之後就好似了咗件事。近排范徐麗泰佢自己話, 佢話民意, 中央好清晰, 好清楚, 梁振英又出嚟講, 董建華又出嚟講。但如果民意真係咁清晰, 佢哋真係咁清楚, 點解香港會有雨傘運動, 點解會有咁多人走上街頭, 點解會有咁多人佔領到今日都依然堅持繼續佔領?呢個政府完全係同大家所謂嘅民情係背道而馳。再講啲啲, 其實大家話, 香港特區政府嘅時候, 我哋覺得佢要問責, 因為佢係處理特區嘅事宜, 再講到北京, 再講到人大嘅時候, 我相信831當日落閘嘅時候, 我相信好多人都有相同嘅感受。你望住個電視機, 見到李飛講話, 廣大嘅香港同胞你哋好呀, 你哋嘅命運又再一次俾我哋主宰啦, 你哋返屋企唞啦, 嘅時候, 我諗好多人都好憤怒嘅就係, 李飛你係邊個? 我有投票俾你咩? 我有選你咩?由制度上面去講, 由認受性上面去講, 當然佢會受到極大嘅質疑, 佢會受到極大嘅不信任, 好可惜嘅就係, 呢二十幾年, 由八十年代開始, 一國兩制, 港人治港, 高度自治, 中英聯合聲明, 就係咁樣簽署咗, 就係咁樣行過嚟。好多人好多時候係身不由己。你話今日咁樣嘅歷史格局, 咁樣嘅現實局面, 你話你掌握咗好大嘅中央主權, OK, 冇問題, 咁但係, 喺咁樣嘅情況之下, 如果你都期望香港人尊重你嘅話, 請你都俾啲尊重你自己, 就係唔好吓吓都以為, 你哋所謂喺北京嘅時候, 喺中央政府擔當位高權重嘅官員嘅時候, 就可以將十幾年嚟, 大家認為你哋應該相守承諾嘅制度, 一一抹去。今日, 佢話可以註銷回鄉證, 其實同佢六月份發放管治白皮書, 831落決定嘅時候, 背後我哋對佢嘅擔憂係完全一樣。佢當日可以咁樣做, 一紙落嚟, 就將諾言全部推翻, 一個官員行落嚟, 就話佢哋嘅決定取代咗香港人聲音嘅時候, 咁喺未來呢, 未來面對唔同議題嘅時候, 民生議題又好, 社區議題又好, 地區議題又好, 係咪當佢話唔鍾意, 佢話唔願意嘅時候, 我哋所有香港人嘅意願, 都好似螻蟻咁樣再一次被踏碎呢?呢個係我哋絕對唔希望見到嘅局面, 亦都唔認為一國兩制港人治港高度自治嘅情況下, 個制度係應該咁樣運行。香港人, 喺呢個制度, 係應該有佢嘅角色。我哋嘅地位, 我哋嘅身份, 我哋嘅聲音, 係應該受到尊重。今日佢註銷回鄉證, 係對一代人嘅侮辱。佢可以將年青人嘅聲音排除在外, 一如佢以往幾十年嚟, 將好多香港人嘅聲音都排除在外。以往佢排除, 你哋今日有雨傘運動。今日佢又排除, 我唔知道, 明年, 下年, 往後, 呢個雨傘運動, 會進化成一個點樣更加具有社會威力嘅運動。政府短視, 毋庸置疑, 佢認為捱得一關就一關, 佢哋就可以過骨, 但我相信, 呢個必然, 短視, 係會令佢覆亡。香港人今日依然行喺度, 依然企喺度, 依然堅持到而家, 就係我哋認為我哋唔會放棄。因為冇任何一個放棄嘅理由。未來係屬於我哋嘅。今日佢註銷回鄉證, 有問題, 但我哋香港人, 係會用我哋自己嘅方法, 去捍衛番我哋認為要捍衛嘅一國兩制。831框架, 我哋唔認同, 我哋就會否決佢。你期望再喺嚟緊推所謂第二輪諮詢階段, 繼續製造所謂嘅虛假民意, 繼續希望去製造一個假貨嘅政改方案, 我哋就會繼續杯葛佢。我哋唔認為, 政府呢個大話, 係可以繼續呃落去。我哋知道, 杯葛, 否決, 我哋必然係會要求佢重啟五部曲。喺當下, 佢嘅831框架, 絕對唔應該成為掣肘香港人嘅框架。因為我哋知道, 佢昔日, 你有831框架, 我哋就有雨傘運動。佢再嚟多次, 只不過係會令到個火球越滾越大。立法會喺明年三四月或者五六月嘅時候, 佢先會將個方案擺上去議會審議。但喺當下之前, 我哋依然係會繼續推進我哋喺香港嘅抗爭。今日, 係呢個抗爭運動裡面嘅一小步。當然佢嘅象徵意義, 有佢自己一代嘅意義。佢象徵住呢個政府, 就係唔希望再同香港人對話。但如果佢個制度係咁不堪, 咁斷絕大家嘅路嘅話, 咁我相信, 香港人, 必然, 係會喺制度以外繼續抗爭, 就好似我哋呢四十幾日嘅佔領運動咁樣, 我哋必然, 除咗佔領以外, 亦都會尋覓其他嘅方法, 繼續喺呢個社會上面頑抗, 令到佢哋知道, 我哋係唔會畏懼呢個濫權嘅政府。應該畏懼嘅係佢哋。
羅冠聰: 大家好, 我係學聯常委羅冠聰。我今日嘅心情係同831嗰日係有啲似。喺831之前我哋做咗好多地區工作, 我哋有好幾個月嘅宣傳工作, 我哋有622嘅公投, 去決定我哋嘅民間聲音, 去決定我哋想要嘅未來。831個框架一落嚟, padd, 打咗我哋一巴。我哋喺過往幾個星期, 一直都好希望, 喺一國兩制嘅框架下尋找我哋解決辦法嘅一個途徑。我哋同政府對話, 佢咩都冇答應到。我哋去信人大, 人大常委, 港區人大常委作為香港喺中央嘅一個橋樑, 佢係理應去協助我哋, 將中央或者香港政府一直忽視咗好耐嘅一啲訴求擺上枱面。佢哋冇理到我哋。我哋過往幾個星期嘅努力, 去到今日, padd, 我哋連check in都check in唔到。我哋去到櫃枱, 佢哋同我哋講, 我哋回鄉證就係被註銷。呢兩巴摑落嚟, 我嘅傷痛都係好類似。記得中央嘅官員, 佢喺過往嘅一段時間, 會面咗香港嘅權貴, 由呢個董建華率團帶領。前嗰幾日, 會面完各個外國勢力嘅首長, 交換完意見。但係今日, 面對住幾個係有回鄉證嘅學生, 係帶住幾十年, 幾十萬人民主訴求嘅學生, 上京去希望尋求一個解決問題嘅辦法。佢冇理會到。呢個唔係只許州官放火, 不許百姓點燈嘅行為咩? 我哋帶住法、理, 我哋有我哋憲法下面嘅證件, 我哋係應該可以自由嘅進出中國嘅國境。我哋帶住理據, 帶住幾十年, 幾十萬人嘅民主訴求上去, 佢都一一無視。就係因為, 呢一個政府, 佢嘅政治操作, 係大於一切。呢個政府嘅權力無限擴張, 係可以去到無視法治, 無視法理, 無視道理。我哋見到咁樣嘅情況, 可能好多人都話, 算啦, 佢哋係咁架啦。但我想講, 呢個問題, 係必須要正視, 唔能夠習以為常; 我哋必須保持警惕, 保持憤怒; 因為我哋成日話, 香港嘅制度同埋大陸嘅制度有乜分別呀, 好多人都話, 大陸係人治, 香港係法治, 就係因為我哋覺得, 香港嘅法律係可以限制呢啲權力嘅膨脹。當我哋三番四次講, 唉, 係咁架啦, 預咗架啦, 我哋其實係一再對呢啲權力嘅膨脹係麻木咗。就好以我哋見到香港嘅警方, 不停打啲市民, 七個警察毆打一個市民, 警棍一棍一棍打落去, 流哂血, 預咗架啦。有啲人真係話預咗架啦, 你行得出嚟就預咗架啦。我哋見到梁振英僭建, 貪污, 但係我哋冇任何途徑去處理佢, 去令到佢受到應有嘅制裁, 亦都有人話預咗架啦, 係咁架啦。但係我哋真係要再問一句, 你話預咗, 咁你係咪認同, 香港都係人治, 而唔係法治呢? 我哋必須要對呢啲權力嘅膨脹保持警惕, 因為我哋明白到人治喺呢個地方係行唔通, 我哋必須要敵視佢。我哋唔能夠俾任何一個高官嘅權力操作, 係可以令到我哋嘅規則蕩然無存。所以希望大家面對呢啲權力膨脹, 高官無恥嘅行為, 大家一定要保持憤怒, 保持警惕, 呢啲嘢唔應該, 亦都唔可以話喺香港係預咗。啱啱講起回鄉證, 回鄉證呢個名係咪好浪漫。一個浪子返番去母親嘅懷抱。回鄉證。我承認我嘅鄉下的確喺大陸嘅。我係喜愛我鄉下嘅田野, 我係喜愛我鄉下嘅氣味。但係, 就係因為呢一張回鄉證, 令我回不了鄉。我係有(喺)我嘅合理基礎之下自由進出我嘅國土。而呢個中國共產黨, 佢只係我哋呢一片土地過去數千年嘅歷史裡面, 其中一個齒輪, 幾十年嘅一個政權, 佢憑乜嘢切斷我同我土地嘅一個連繫呢? 佢憑乜嘢要我同呢個土地嘅情感係要割裂呢?係好諷刺架呢張回鄉證, 係充斥住大陸式嘅矯揉造作嘅氣息, 就係同你講, 你返到嚟媽媽嘅懷抱啦, 但其實, 佢陰啞底, 係一腳踢開你。一國兩制, 一國呢度大門, 好似係越嚟越小嘞, 度門越嚟越小。真係我哋學生係行唔到入去。而兩制亦都好似係擠不進呢度大門, 呢度小門。我哋兩制理應係分隔得好遠, 理應係有明確嘅分野。但係呢一度門, 佢慢慢令到我哋, 縮窄我哋嘅距離, 慢慢令到兩制漸漸無辦法容納一切, 漸漸行進同一個軌道。呢個係我哋永遠都唔想見到, 亦都唔應該喺未來出現。今日同我講, 我嘅回鄉證被註銷嘅, 係一個國泰嘅職員, 係一個航空公司嘅職員。兩個政府嘅代表呢? 內地政府嘅代表呢? 香港政府嘅代表呢? 點解連我回鄉證咁重要嘅事, 佢都淨係搵個商業機構嘅員工同我講?!香港政府, 代表香港人民嘅so called嘅港區人大, 你哋去咗邊呢? 當你見到我哋嘅市民, 學生, 我哋有住法理嘅基礎, 係希望搭飛機橫跨中國, 將我哋嘅聲音帶上去北京, 係希望尋求解決嘅辦法, 係幫緊你執緊你嘅爛攤子呀。但係你哋呢, 政府冇任何一個人出嚟交代, 亦都過去一段時間, 港區人大不停挖苦, 不停喺度詆譭學生。未來一國兩制嘅道路, 都一定係越嚟越難行。香港政府同埋港區人大都一定係會繼續用駝鳥政策去漠視市民嘅聲音。我哋一直講緊嘅命運自主, 其實去到呢一個部份, 亦都包含住我哋能唔能夠回到故土, 回到我哋嘅鄉下, 回到我哋應該可以進入嘅一片大陸嘅一個權利。要得到命運自主, 我哋必須要係令到香港政府、港區人大, 係能夠捍衛番香港人嘅權益, 而唔係單純跪喺度, 聽中央講乜嘢就接受, 跪喺度做舉手機器, 咩都唔聽, 咩都唔做。只有我哋爭取到我哋嘅政制, 政府係代表市民, 甚至連港區人大, 都係由市民選出嚟, 都係代表市民, 先至能夠解決呢個狀況, 先至能夠扭轉我哋未來嘅命運。
鍾耀華: 大家好, 我係學聯常務秘書鍾耀華。我覺得今日呢, 被註銷回鄉證呢, 我覺得對我嚟講係一個莫大嘅侮辱。我估今次呢個雨傘運動, 其實都係圍繞住一個問題, 就係關於尊嚴嘅問題。其實尊嚴呢, 唔係好抽象嘅東西。大家出得嚟呢, 正正係因為我哋嘅尊嚴就係話, 我哋連最基本嘅生活嘅權利都慢慢被縮窄, 被剝削。我哋見到社會好多嘅問題, 我哋呢個社會有超過一百萬嘅貧窮人口, 好多老婆婆, 老人家, 仲要喺街上面收拾紙皮, 呢啲全部都係呢一個不民主體制底下, 佢哋傾向大財團、既得利益者落嘅決定。今次運動講到尊嚴嘅問題, 正正係因為社會係有好多好多嘅不公義, 我哋記得, 我哋嘅尊嚴, 呢啲社會嘅權利, 呢啲核心價值被剝削, 我哋先要走出嚟。而同時, 今日被註銷回鄉證, 係另一種對尊嚴, 對核心價值嘅一個剝削, 嘅一個侮辱。因為我哋上去其實係帶住一個我哋港人嘅民主訴求。我哋好清楚, 我哋堂堂正正帶上去, 但係佢哋就逃避責任。點樣逃避責任呢? 1.唔直接面對我哋香港人對民主嘅訴求。2.正如羅冠聰話, 佢喺撤銷我哋回鄉證嘅時候, 佢唔係用一個官方嘅身份去講, 係透過一個商業機構嘅服務員出嚟同我哋講話, 有關當局撤銷咗我哋嘅回鄉證。呢個證明呢個北京政府呢係唔願意對香港嘅民主有承擔, 你睇佢連註銷我哋回鄉證嘅責任呢都要卸咗俾一個商業機構。其實係好過份嘅一件事情。咁所以話, 如果今日我哋香港話喺一國兩制嘅制度底下走到呢一步, 呢一步係乜嘢步呢, 就係社會不公極大, 貧富懸殊極嚴重, 係發達地區裡面最嚴重嘅一個地方, 我哋嘅基本權利不受保障, 我哋嘅民主訴求係不被承擔, 係連當日承諾嘅北京政府都唔承擔我哋嘅民主訴求嘅時候, 一國兩制走到今天, 我哋要嘅社會公義, 我哋要嘅民主制度, 我哋要嘅出入境自由, 言論自由嘅權利都被剝削嘅時候, 我哋有必要反思, 到底一國兩制走到今天, 其實係有咩問題, 應該要點樣走落去?過往十七年呢, 一國兩制似乎係一個政治禁區, 大家唔敢提, 好多社會賢達都講一國兩制, 但一國兩制到底係啲咩呢? 大家唔願意去傾。大家唔願意challenge, 唔願意去挑戰佢。其實今日, 我哋唔係做咗啲咁特別嘅事, 我哋唔係好多嘢做, 我哋只係, 正如周永康話齋, 行前咗一步, 只不過係我哋走去直接面對一國兩制嘅問題, 直接面對一國兩制實踐不佳嘅源頭, 即係北京政府。我哋係必須要思考, 一國兩制去到今天, 問題出現喺邊度。我估呢個係我哋未來每一個人都不能逃避嘅責任, 就係話一國兩制到底點樣走落去。唔可以再好似以前咁樣覺得, 唉, 唔好理佢啦, 算啦, 唔好理北京政府。我哋見到社會實實在在每一天呢, 都係受住呢個北京政府同埋香港政府嚟影響我哋嘅生活。所以呢我哋係要正視嘅。一國兩制走到今天呢, 十七年。五十年不變嘅承諾亦都走到三分之一有多。大家記得, 當日講呢一個主途移交嘅問題嘅時候呢, 九七年主權移交, 八三年, 八二年呢就已經開始聽呢個問題。即係話喺所謂大限之前十幾年呢, 就已經開始討論呢個問題。如果用番五十年不變呢個框架去睇嘅話呢, 五十年不變即係2047啦, 十幾年, 如果話都係要處理呢個問題, 都係要用十幾年嘅話呢, 咁即係話去到二零三幾年嘅時候呢, 我哋就要面對呢個問題。其實好快就到架啦。呢個係唔能夠迴避嘅問題, 唔能夠想像一國兩制係美好嘅。制度呢係會出現問題嘅, 隨住時代嘅轉變, 我哋要面對佢。我估呢個呢, 係北京政府呢, 係要面對嘅一個挑戰。你總唔能夠逃避。佢唔能夠將香港嘅狀況呢, 以一國兩制之名, 封鎖喺八十年代嗰種傾斜大商家, 所謂嘅吸納式民主, 就係諮詢吓你就算啦, 唔駛理你哋。嗰啲嘅華人精英。今天嘅華人精英係咩呢? 就係嗰啲坐喺立法會嘅工商界別, 功能組別嘅議員。佢哋係唔理民情架嘛。落過嚟佔領區嘅, 有邊一個功能組別係落過嚟嘅? 冇。所以其實一國兩制去到今天呢, 我哋發覺, 係一個香港政府同埋北京政府著意將香港嘅狀況封鎖喺八十年代嗰種制道, 傾斜資本家、傾斜大商家嗰種制度。呢個係我哋必須要正視嘅問題。如果北京政府今日佢唔理我哋嘅訴求, 佢卸責, 唔承擔我哋嘅民主訴求, 香港政府無辦法處理, 咁就由我哋呢度每一個去處理。呢個, 我估係好多人, 好多朋友, 點解今日都要走出嚟站喺街頭咁多日, 日日都, 大佬, 四十幾日, 如果由罷課計起兩個月, 大家坐喺度、企喺度嘅原因。呢啲社會嘅怨氣呢、不安、不滿呢, 其實唔係話驅散咗廣場就可以。呢個係需要一個制度上嘅改革去處理佢。如果我哋嘅施政者唔透過政制嘅改革去面對種種嘅社會不公義, 權利失效嘅問題嘅時候呢, 其實佢將會無辦法管治呢個社會。佢已經浪費咗上兩代人嘅青春。我覺得我哋要問呢個政府, 到底係咪仲要浪費往後幾代人嘅生活? 我成日都好感慨呢就係見到, 喺個佔領區見到, 三個佔領區, 好多企喺度嘅人呢, 係有白髮蒼蒼嘅老人, 係有好多中年人。但佢哋今日都仲要走出嚟對抗呢個社會嘅不公義, 證明咗呢個社會真係浪費咗好多人嘅青春, 一代又一代人嘅青春。我覺得我哋係要一齊走出嚟去將呢個社會制度改革。如果嗰樣嘢合理, 我哋就去爭取, 如果佢唔俾我哋權利, 就由我哋去做。我哋做埋佢嗰份。呢個我估係一國兩制將來點樣走落去, 最重要嘅問題。我哋係唔能夠靠呢啲代議士, 我哋要靠我哋去爭取屬於我哋嘅東西。唔能夠再俾呢個北京, 或者建制派去壟斷一國兩制嘅詮釋權。一國兩制, 乜嘢回到母親嘅懷抱呀, 嗰啲乜嘢浪子回鄉嗰啲呢, 咁矯揉造作嘅做法呢, 其實係無內涵嘅。我哋要正視個核心嘅問題。正視個制度嘅問題。呢個就係靠大家, 整個社會。都係嗰句就係, 我哋真係無乜做過啲乜嘢, 我哋只不過係去咗機場, 無乜嘢就返咗嚟, 其實無乜嘢咁了不起。了不起嘅係你哋每一位。同時, 最後, 我最希望借你哋在座每一個嘅掌聲, 係俾學聯其他喺佔領區留守同埋幫手嘅朋友。(掌聲不絕) 其實幕後呢佢哋係做咗好多嘢架。冇幕後係做唔到呢啲嘢架。唔好覺得, 即係, 好多人佢哋唔喺個台上面但佢哋好重要。亦都希望借大家嘅掌聲俾每一位唔同嘅民間團體, 唔同嘅政黨, 佔領中環三子同埋佢哋嘅義工呢, 所有嘅組織嘅朋友。佢哋都係同大家一樣, 係喺呢度撐緊成個佔領運動。亦都俾呢度嘅掌聲, 借大家, 俾全香港嘅市民, 無論佢持咩立場, 支持定係反對都好, 正正係因為社會, 個政府唔去處理政治問題... (影片完)
岑敖暉: 我呢, 我今日係同周永康分開嘅。(鍾同學和他調位) 今日學聯嘅三位代表被拒出境, 代表嘅意義不僅僅係搭唔到飛機, 唔僅僅係去唔到紫禁城, 佢哋去唔到天安門咁簡單, 代表嘅更加係周永康喺記者會所講, 係將一整代年青人嘅聲音, 甚至係全香港追求民主嘅聲音嘅大門係關上咗。佢係連同八月三十一號人大嘅決議, 係將香港人追求民主嘅大門係嘭一聲關實咗。面對住呢個困境, 面對住呢個難題, 雨傘運動去到五十日, 香港人辛苦咗五十日, 可能我哋大家都會疑惑, 點解我哋仲坐喺度, 可能我哋都會灰心, 點解呢個政府可以咁無恥, 可以完全唔回應我哋嘅訴求。可能我哋都好攰, 但我哋要明白, 或者要正視嘅問題係, 的而且確, 我哋呢場運動, 爭取嘅唔係呢個社會可能一小部份問題嘅運動, 而係爭取緊一個全面嘅政制改革, 係牽涉到全港唔同界別嘅利益, 甚至係中共嘅權力關係, 中共嘅利益。所以我哋面對嘅, 仗一定係好難打, 我哋面對嘅路呢, 絕對係漫長嘅。今次面對嘅問題, 我覺得絕對係一個起跑線, 或者係香港人民主運動嘅轉捩點, 但我相信絕對唔係香港人爭取民主返屋企休息嘅一點。就算佢今次清場, 佢將我哋全部拘捕, 佢將我哋全部判坐監, 我哋都一定會再出返嚟, 因為香港人係唔會放棄。甘地, 佢為咗佢自己印度嘅一啲基本權利, 不斷咁奮鬥, 不斷咁公民抗命, 佢坐咗29次監。連同有印度60萬人迫爆個監獄, 係60萬人, 先至達到佢想要達到嘅效果, 先至成功爭取到佢想爭取嘅嘢。所以我哋要有心理準備, 我哋可能會灰心, 我哋可能會疑惑, 我哋可能會攰, 但我哋要休息, 我哋要重整心理準備, 我哋要繼續上路。因為我哋好清楚知道, 冇民主, 好簡單, 唔罷休。但我哋亦都好清楚知道, 我哋面對緊嘅, 其實係一整個政權, 特區政府, 中共政權, 佢哋有嘅係成個政府機關, 佢哋有嘅係輿論機器, 佢哋有嘅係軍隊, 係警察, 係幫佢執行命令嘅機器。我哋嘅力量可能好似好懸殊, 我哋嘅力量可能好似好微弱, 但我哋靠嘅並唔係槍, 我哋靠嘅並唔係胡椒噴霧, 我哋靠嘅更加唔係催淚彈, 即係唔係你寫文寫到你喊嗰啲催淚彈吓, 我哋靠嘅亦都唔係幫政府執行命令嘅人, 我哋靠嘅, 係我哋對我哋屋企嘅熱情, 係我哋對於民主嘅追求, 係我哋對於基本權利, 包括係民主政制嘅堅持。所以一日冇民主政制, 答番鍾耀華問嗰個問題, 呢個政權已經浪費咗一整代嘅青春。佢哋係咪仲要浪費往後幾代人嘅青春呢? 我可以答, 或者我相信嘅東西係, 香港人如果爭取唔到民主, 無論幾多代, 都會繼續企出街頭同你爭取落去。所以雨傘運動去到呢個困境, 或者去到呢一步, 我哋要思考嘅問題就係, 香港嘅民主運動, 或者係雨傘運動彰顯出嚟嘅民主力量, 到底要點樣轉化, 或者係點樣延續落去。當然其中一個方法就係不停咁抗爭, 不停咁公民抗命, 好似馬丁路德金咁, 好似長毛咁, 不停咁抗命, 呢個亦都係必然會做嘅事情。但係另一個方向就係, 大家可能都有聽到頭先兩個中大學生會嘅朋友分享嘅就係, 其實佢哋已經係做緊嘅社區工作, 佢哋已經喺唔同嘅社區擺街站, 佢哋已經喺唔同嘅社區組織傾偈隊, 我哋會發覺, 好似啲市民平日會媽叉我哋, 會叫我哋唔好搞事, 會話我哋係廢青, 會話我哋係外國勢力。但當我哋同佢哋親身接觸, 佢哋會發覺, 喂其實呢班口靚仔都唔係咁衰咋喎, 呢班口靚仔個樣唔係搞事, 佢哋個様唔似收錢喎。雖然好似佢哋咁講, 未必可以令佢哋即刻走上街頭, 未必可以令佢哋參與公民抗命, 但至少, 我哋同佢哋傾偈, 同佢哋親身接觸, 令到佢哋改變我哋參與雨傘運動, 參與抗爭, 所謂搞搞震嘅朋友嘅觀念。咁唔係已經係一個進步咩? 咁唔係已經係一個改變咩? 我哋要撼動一個咁強大嘅政權, 我哋要改變一個咁強大嘅體制, 我哋要爭取啲咁徹底嘅東西, 改變, 我哋必須要正視, 必須要相信, 亦都必須要克服嘅一個問題就係, 改變一定唔係一朝一夕, 改變一定要慢慢做, 慢慢感染, 慢慢演講, 慢慢同人傾偈, 慢慢去用唔同嘅方法, 去令到更多人企喺雨傘運動, 企喺民主運動嗰一邊。我哋未來可能會面對清場, 面對禁制令, 面對政治檢控, 面對可能秋後算帳, 都一定要做嘅工作, 去令到更加多嘅香港人企喺我哋呢邊, 令到更多香港人願意付出, 願意抗命, 願意爭取民主, 願意為自己嘅屋企奮鬥, 呢個就係我哋嘅目標。共產黨可以拒絕三位朋友上京, 可以撤銷佢哋嘅回鄉證, 但佢不能夠阻止我哋繼續去改變香港, 繼續去爭取我哋嘅支持(堅持)。未來無論係立法會嘅否決權, 唔同嘅社會議題, 15年區議會, 16年立法會選舉, 都係我哋嘅戰場, 都係我哋同共產黨, 同保皇黨, 同建制派對決嘅地方。所以各位香港人要保重身體, 呢場仗係有排打。香港人要加油。
周永康: 聽完幾位朋友講, 上京嘅過程裡面呢, 其實有啲嘢係可以同大家分享。其實面對北京嘅時候, 有好多朋友諗, 其實去北京有冇用呢? 去北京好似好無力添, 去北京好似係好危險嘅一件事。咁我想話其實我哋幾位, 或者話學聯傾嗰陣時, 其實都係一個克服恐懼嘅過程。我哋傾去北京嘅過程, 有時有啲朋友會問, 你哋準備成點呀? 你哋有咩準備呀? 大家都傾向呢其實有好多嘢係唔公開得。有啲時候有啲人會覺得, 喂你哋係咪玩假架, 係咪做戲架, 係咪hea吓就算架? 咁我哋必須要講嘅係, 喺我哋同好多唔同(熟悉)國情嘅朋友去傾嗰陣時, 佢哋都會同你講, 好多嘢確實係唔可以擺上枱。喺以往好多年唔同嘅時候, 學聯其實好多人都有上京, 或者唔同嘅民間團體, 維權律師, 或者係香港嘅民主運動參與咗好多嘅朋友, 佢哋都有上京嘅過程。喺裡面佢哋會討論到啲乜嘢呢? 當然其中一個就係係咪光明正大咁樣上去吖, 定係唔公開, 就咁過咗境, 然之後再上去, 然之後去搭巴士呀, 去穿州過省呀, 然之後去到目的地, 然之後再爆出嚟。咁喺今次上京嘅過程, 其實都搵咗好多(熟悉)國情嘅朋友去傾, 吖其實上面俾大家入嘅機會都唔高架喎, 可能佢哋都好緊張架喎, 如果你APEC去呢, 佢哋會覺得你哋玩嘢架喎。咁大家就諗, 吖, 大家係以對話為目標架嘛, 咁唔係APEC, 唔緊要啦, 如果APEC之後可以對到話咁咪APEC之後去囉。咁所以大家先到, 我哋一開始提議呢個idea, 然後搵啲中間人去幫手, 之後佢哋reject我嘞, 咁我哋覺得, 都係要去嘅。你話喺討論過程裡面, 大家驚唔驚佢哋下毒手呢, 大家驚唔驚佢哋打你呢, 呢幾個人, 大家都傾過嘅就係, 喂, 八九, 有李卓人, 佢要簽悔過書, 大家都傾過一個共識就係, 俾佢打呢, 大家都係唔會簽悔過書架嘞, 除非佢攞支槍指住我個頭啦。如果唔係, 都係唔會簽悔過書架嘞呢個位。因為覺得冇錯吖嘛, 仲乜要簽悔過書呢?然之後大家都知道, 近呢幾日, 大家咪見到有啲黃色嘅banner擺喺唔同嘅佔領區, 上面寫住我要真普選, 大家其實可以喺塊banner度鍾意寫咩都得嘅。有啲寫垃圾政府, 有啲寫結束一黨專政。然後喺結束一黨專政對面呢, 就寫咗我愛祖國, 我要新中國, 其實乜嘢都有嘅。咁大家去睇呢塊banner嘅時候, 有時都會擔心, 喂, 你寫住嗰啲打倒中國政府嘅標語, 上到去, 海關見到, 會唔會話你尋釁滋事架。咁咪會中招囉, 咁咪會搭你返去囉。咁喺呢個過程, 大家都心諗, 喂係喎, 有啲咁嘅顧慮喎, 點樣對塊banner呢。但係最後大家都覺得, 唔係吖, 其實塊banner咪反映咗香港嘅情況囉, 你喺寫祖國嘅對面可以寫打倒共產黨, 咁呢個確實係香港民情嘅反映嚟。咁如果話係泱泱大國, 點解唔可以接受呢啲聲音帶到去北京呢?但當然好可惜嘅係, 塊banner連入境嘅機會都冇, 上到機嘅機會都冇。然之後就已經被遣返返嚟。大家都有諗, 如果公安話要收返塊banner, 咁其實係咪完成咗一半呢? 佢哋有官方嘅職員收咗塊banner, 塊banner由香港去到咗北京, 咁係成功咗一半呢呢樣嘢? 咁當然啦, 大家係講笑咁講啦, 或者係評估大家安慰大家咁講啦, 咁成個過程裡面, 除咗大家會傾呢啲嘢, 大家亦都會傾, 去到, 到步嘞, 去到北京嘞, 佢會點對你呢? 有幾種scenario嘅, 有啲評估過嘅, 佢即時會即時原機遣返, 有晏啲嘅機, 咪夜晚踢你返嚟囉, 咁如果佢唔俾你入境呢, 佢都會請你哋去飲茶, 將幾個人分隔喺唔同地方, 然之後就各自盤問, 審問你家世呀, 審問你家庭背景呀, 審問你有冇收外國錢呀, 審問你個腦係咪俾人洗咗呀, 審問你幾十萬人係咪收咗錢呀, cake lake kwak lark呢啲問題, 你都知道, 其實佢哋係唔識香港嘅民情。有另一種scenario就係, 就算你入到境, 你出到北京機場, 你去搭車呢, 可能嗰啲港澳辦, 嗰啲國安, 都已經會截住你嘞, 會話, 喂, 口靚仔, 跟我上車, 或者就算你去搭的士呢, 個司機可能都係國安、公共嘅人嚟嘅。咁所以你話, 喺成個過程裡面, 好多不同朋友都話, 喂到底你個行程係點樣呀, 咁我哋都會好納悶咁諗, 唉而家公開咗個行程, 究竟仲去唔去到呢? 呢個係好現實嘅問題。咁但係你就見到嘅係, 喺成個過程裡面, 有時會見到, 點解去北京會係咁無力? 咁害怕?你睇到, 由香港起步到北京抵步, 入到去, 成個過程係要經過幾咁多嘅過程, 去挑戰幾多嘢, 個過程係幾咁扭曲。大家諗吓, 大家去日本, 去巴黎, 去其他地方, 去韓國, 需唔需要思考咁漫長嘅過程, 好似忍者咁様, 要深入國境, 然之後要去準備萬全嘅裝備, 去睇吓附近到底有冇人鉗住你, 然之後再上車, 唔需要吖嘛。即係確確實實就係, 當如果你係帶住一啲, 香港人你覺得好正義嘅政制民主訴求, 你相信嘅自由價值, 你上到去嘅時候, 確實你就需要面對啲咁嘅問題。呢個係個好扭曲嘅國度, 呢個係個扭曲嘅制度, 你話我哋今次上去, 雖然我哋最後都係上唔到去, 但係我哋希望喺個過程裡面, 將呢個咁扭曲嘅嘢彈返出嚟, 話俾社會聽, 點解香港嘅民主政制, 你話見到咁多嘅障礙, 咁多嘅阻礙, 唔係正正因為呢個咁扭曲嘅制度, 亦都係正正因此, 我哋先會覺得, 我哋會咁堅持落去。喺我哋個行李篋裡面, 除咗話有黃色banner, 其他準備嘅物資, 其實仲有一本書, 一本叫72511(見證)公民抗命嘅書, 因為有朋友同我哋提過, 吖, 如果我哋上到去, 佢哋話唔熟悉香港嘅民情嘅話, 咁就攞本書佢睇吓啦。因為今次抗命, 今次雨傘運動, 而今年對上一次嘅公民抗命, 就是七月二號, 511人被捕嗰一刻。攞住本書, 直接就俾佢啦, 睇啦, (鍾同學: 讀俾佢聽) 讀俾佢聽添呀, 諗住, 嗱, 今日你話十一月, 幾個月前, 七月, 你話七月, 由七月開始你唔理民情, 一個月, 兩個月, 三個月, 四個月, 五個月, 咪有雨傘運動囉。但係諗起72511嗰本書, 諗起岑敖暉講, 又真係幾唏噓嘅一件事, 就係喺八月三十一號嗰個夜晚, 你話落住雨, 喺添馬公園, 陳建民喺台上面講, 我哋望住佢哋嘅背影, 我哋諗, 一個大學教授, 三十年嘅生命就咁俾佢浪費咗。政制民主, 寸步不移。望住七月, 到到呢一刻, 我哋覺得, 唉, 香港人, 又俾佢浪費咗幾個月嘅時間。真係非常唏噓嘅一件事。大家都覺得, 你係要同我哋玩吖嘛, 你係要同我哋磨吖嘛, 我哋就必然係會繼續撐落去。因為你望吓呢個政府, 佢將學生排拒在外嘅時候, 大家望吓APEC期間, 呢個中國政府就係同佢最避忌嘅外國勢力不斷喺度摸杯底。個畫面其實係好嘔心嘅諗真啲真係。當你一邊話香港嘅雨傘運動有外國勢力, 你自己就喺首都嗰度, 不斷同其他嘅所謂嘅外國勢力喺度猜程尋, 喺度傾大家有啲咩著數, 有咩jetso。學生上到去呢, 就一腳伸埋去, 話你証件都唔等駛。呢個就係大家所謂嘅泱泱大國。喺咁嘅情況之下, 大家都見到, 一國兩制, 以往大家都話佢係個好聰明, 好有創意嘅設計。但喺當下呢, 大家都見到北京政府將個波dum返嚟香港, 香港dum個波返去北京。完全有民意, 但係漠視民意。一國兩制唔再係一個全世界首屈一指嘅制度, 而係一個不斷用嚟拖延大家意志, 消磨香港人, hea香港人嘅一個制度。你咁樣做, 只會令我哋更加堅定地同你講, 我哋有我哋嘅信念, 我哋有我哋對民主政制嘅追求, 我哋相信自由, 我哋相信公義, 我哋相信人權, 我哋相信平等, 我哋相信法治。我哋會將呢啲精神注入返呢個制度裡面。我哋會身體力行, 我哋會公民抗命, 亦都係呢種精神嘅展現。提到清場, 有啲人會話, 我哋hit and run, 避開佢, 唔做白白嘅犧牲。但同時間, 我哋不怕被捕, 亦都係呢個運動裡面需要彰顯嘅精神。大家諗返起, 呢場運動裡面, 有佢嘅特色。我哋有好多人, 我哋可以充斥喺唔同嘅路上面, 我哋可以抵禦到警察對我哋嘅施襲。但同時間, 諗吓七二, 當你有511個人被拘捕嘅時候, 其實佢都唔係甘甘自願, 純粹企喺度, 大家被捕被侮辱。而係當你有一批人, 511個人, 當你係轉做五千個人, 五萬個人, 佢哋係被逮捕嘅時候, 誰是誰非, 其實一清二楚。係好清楚嘅到時候。呢個當然, 唔係每個人都可以承擔到嘅後果。但係, 喺個過程裡面, 追求公義嘅訴求, 被政府暴力鎮壓, 濫用司法, 濫用警方嘅時候, 香港人係會睇得好清楚, 呢個世界亦會睇得好清楚。道理係企喺追求公義嘅人嘅身上面, 唔係企喺濫權嘅人身上面。呢個係我哋, 由第一日開始, 到今日, 我哋都堅信嘅信念。
鍾耀華: 啱啱周永康, 唔好嫌我長氣, 周永康講完之後呢, 我又有啲想法嘅就係, 因為佢啱啱講到, 我哋上北京, 其實有好多考慮, 會唔會個橫額上面有啲敏感嘅字句, 會唔會拉咗之後呢, 就會即係我哋會有啲咩事, 我哋會唔會被人打之類。我覺得呢個同我哋今次呢個雨傘運動好相似嘅就係, 其實我哋係一直嘗試克服恐懼, 打破恐懼。今次我哋, 其實克服咗對警察嘅恐懼, 其實大家對公義嘅追求呢, 係唔能夠, 係唔會(因為)被粗暴嘅警察襲擊呢, 就會退縮。我哋克服咗對社會不公義嘅恐懼。我哋唔會覺得社會不公係必然嘅事實, 壓過我哋嘅身上, 我哋主動走出嚟去挑戰佢, 我哋主動走出嚟去要求佢哋去改革佢。我哋今次克服咗對政權嘅恐懼。我哋堂堂正正走出嚟同政府對話, 同大家一齊, 對住呢個政府, 去話俾佢聽大家嘅訴求。我哋唔再懼怕公權力, 唔再懼怕嗰啲壓榨我哋生活嘅公權力。今次嘅北京之行同樣係一個克服恐懼嘅過程。我哋克服咗過往對北京政府嘅恐懼。其實有乜值得恐懼呢? 我哋其實就係要堂堂正正將我哋嘅說話帶過去。我覺得最重要嘅精神就係, 我哋學聯有封信, 係自李克強總理閣下嗰封信呢, 叫做時代的選擇, 人民的呼聲, 個題目係。當中我哋提到好多嘅歷史, 包括當日八九年喺天安門發生嘅絕聲嘅事件。有好多人問, 喂點解你哋寫呢啲嘢架, 方丈份人好小氣架喎。但係我哋今次呢, 正正係要帶住歷史嘅記憶, 歷史嘅傷口, 我哋唔要恐懼呀。我哋今次好多時候呢, 我哋成個香港其實係一齊經歷呢個克服恐懼嘅過程。我哋今日唔係要跪喺度說話。我哋係站著說話, 無論對特區政府定係對北京政府。呢個先係最重要, 我哋大家係克服咗恐懼嘅過程, 我哋係要站著說話。我估一國兩制之後點樣走呢, 因為一國兩制過往就係俾啲建制派, 俾啲政府官員, 俾啲中央官員塑造成為壓榨我哋對民主訴求, 對所有社會公義訴求嘅一個擋箭牌嚟嘅。我哋唔再恐懼一國兩制, 我哋正視佢個問題喺邊度, 我哋堂堂正正地講出嚟。面對佢囉有問題, 唔係完美架嘛個制度, 實有錯漏架啦咁咪提出嚟囉。我覺得今次運動好重要嘅係, 大家經歷緊呢個克服恐懼嘅過程, 我好多謝大家同我哋全香港人一齊走呢條克服恐懼嘅道路嘅。同時呢, 最後, 真係最後嘞, 我都想再次借大家嘅掌聲, 其實俾一班同我哋一齊上京嘅傳媒朋友。好多嘅傳媒朋友呢, 其實佢哋上京呢, 相比我哋, 可能面對緊更大嘅壓力, 更大嘅人身挑戰, 即係人身安危嘅問題。而佢哋由運動到今日呢, 佢哋往往喺前線面對住啲催淚彈, 警察嘅警棍, 胡椒噴霧, 但佢哋冇退縮, 報導事實嘅真相, 先會令到雨傘運動, 廣場美麗嘅一面, 俾到全香港嘅市民聽。所以我啱啱都講漏咗, 我哋必須係將掌聲俾全部嘅傳媒朋友, 包括今日同我哋一齊上北京嘅傳媒朋友。
岑敖暉: 今日呢, 其實都有一大班嘅帶黃絲帶, 手查黃遮嘅市民, 係過嚟送三位朋友機。咁都非常多謝大家對於學聯嘅朋友嘅關心。但係三位學聯嘅朋友俾人reject, 俾人彈返轉頭之後呢, 因為真係當時情況好混亂, 都有好多警察圍住佢哋。咁所以我哋當時係冇出嚟, 係冇辦法同埋大家多謝同埋對話。咁喺呢度都要同大家講聲唔好意思同埋同大家講聲抱歉。但係都真係非常之多謝各位香港市民, 尤其是係嚟到機場送機嘅朋友嘅支持同埋鼓勵。(四人牽手躹躬)
映像: https://www.youtube.com/watch?v=EytZYPMqG7w (沒有收錄鍾同學完結辭及岑同學開場辭) (拍攝: SocREC社會記錄協會@CHING。版權: SocREC社會記錄協會) (主圖截圖自同一映像)
映像: https://www.youtube.com/watch?v=YQl5Zbxi6cQ&feature=youtu.be (由岑同學開場辭開始) (拍攝: dhkchannel)
P.S. 感謝每位同學及參與者嘅付出。
P.P.S. 最後transcribe的是鍾同學的第一次講辭, 時間緊迫, 所以很多語氣都沒打出來, 請看片補完。見諒。
P.P.P.S. 打這個transcript, 因為1.覺得這次發言概括了幾位同學嘅立場同理念; 2.從中見到幾位同學各自嘅性格、堅持及concern。3.這些理念, 主流傳媒不會報導。希望籍此transcript能稍微將這些理念宣揚開去。